Zvicra planifikon ta bëjë më të vështirë shmangien e shërbimit ushtarak

Qeveria propozon një reformë që do të bashkojë shërbimin civil dhe mbrojtjen civile në një trupë të vetme

Qeveria zvicerane ka prezantuar një reformë të re që synon të zgjidhë mungesën e personelit në ushtri dhe në mbrojtjen civile, duke e bërë më të vështirë shmangien e shërbimit të detyrueshëm. Sipas planit të propozuar, shërbimi civil dhe mbrojtja civile do të bashkohen në një korpus të ri për mbrojtjen nga fatkeqësitë, ndërsa detyrimi për të kryer një formë shërbimi në interes të sigurisë do të mbetet i detyrueshëm, shkruan The Local, transmeton albinfo.ch.

Autoritetet zvicerane theksojnë se ushtria po përballet me mungesë të konsiderueshme të personelit, ndërsa edhe mbrojtja civile ka vetëm rreth 57 mijë anëtarë, shumë më pak se objektivi prej 72 mijë personash. Kjo situatë ka shtyrë Qeverinë të kërkojë ndryshime në sistemin aktual të rekrutimit dhe shërbimit.

Sipas propozimit, personat që kundërshtojnë shërbimin ushtarak për arsye ndërgjegjeje do të kenë ende mundësinë të zgjedhin shërbimin alternativ, por do të duhet të kryejnë periudha më të gjata shërbimi se sa aktualisht. Kjo synon të shmangë zgjedhjen e shërbimit civil vetëm për të evituar detyrimet ushtarake.

Reforma është pjesë e përpjekjeve të autoriteteve zvicerane për të forcuar gatishmërinë kombëtare në një periudhë kur situata e sigurisë në Evropë është bërë më e pasigurt. Megjithatë, propozimi do të duhet të kalojë procesin e konsultimeve dhe miratimit politik përpara se të hyjë në fuqi.

---