Zvicra me 9 milionë banorë, afro 5.7 milionë janë të punësuar, tregu i punës vazhdon të rritet

Në Zvicër janë krijuar sërish më shumë vende pune gjatë tremujorit të dytë të këtij viti. Motori kryesor i rritjes mbetet sektori i shërbimeve, ndërsa zhvillim pozitiv është regjistruar edhe në industri dhe ndërtimtari, përcjell albinfo.ch.

Sipas Barometrit të Punësimit, të publikuar të enjten nga Zyra Federale e Statistikave (BFS), numri i të punësuarve gjatë periudhës prill–qershor 2026 u rrit me 2 për qind në krahasim me një vit më parë, duke arritur në 5.698 milionë persona.

Krahasuar me tremujorin paraprak, punësimi, i përshtatur sipas faktorëve sezonalë, u rrit me 0.5 për qind.

Shërbimet vazhdojnë të jenë motori kryesor

Ashtu si edhe në tremujorët e mëparshëm, sektori i shërbimeve ishte kontribuuesi kryesor në rritjen e punësimit.

Numri i të punësuarve në këtë sektor u rrit me 2.2 për qind brenda një viti, duke arritur në 4.550 milionë persona.

Sipas Tages Anzeiger trendi pozitiv ka vazhduar edhe në industri dhe ndërtimtari. Në këta sektorë numri i të punësuarve u rrit me 1.2 për qind, në gjithsej 1.148 milionë persona.

Ky zhvillim është veçanërisht domethënës pasi në tremujorin e parë të vitit 2026 ishte ndërprerë tendenca shumëvjeçare e rënies së punësimit në këta sektorë. Të dhënat e reja tregojnë se kthesa pozitive po konsolidohet.

Afro 100 mijë vende pune të lira

Është rritur gjithashtu numri i vendeve të lira të punës. Kompanitë zvicerane kanë raportuar gjithsej 98,700 vende vakante, rreth 500 më shumë se tre muaj më parë.

Rritja e vendeve të lira është regjistruar kryesisht në sektorin e dytë të ekonomisë, ku përfshihen industria dhe ndërtimtaria. Në sektorin e shërbimeve, ndërkohë, është shënuar një rënie e lehtë.

Norma e vendeve të lira të punës në nivel kombëtar ishte 1.7 për qind. Në sektorin e dytë ajo arriti në 2.1 për qind, ndërsa në sektorin e shërbimeve ishte 1.6 për qind.

Kompanitë e kanë më të vështirë të gjejnë punëtorë të kualifikuar

Pavarësisht rritjes së punësimit, kompanitë po përballen me vështirësi më të mëdha për të rekrutuar staf të kualifikuar.

Sipas të dhënave të BFS-së, 33.9 për qind e ndërmarrjeve, të peshuara sipas numrit të të punësuarve, raportuan përkeqësim të situatës në rekrutimin e personelit të kualifikuar. Kjo përfaqëson një rritje prej 0.4 pikë përqindjeje krahasuar me tremujorin paraprak.

Perspektiva mbetet pozitive

Edhe pritjet afatshkurtra të kompanive për punësimin mbeten pozitive.

Rreth 11.3 për qind e ndërmarrjeve presin të rrisin numrin e punonjësve, krahasuar me 11 për qind në tremujorin paraprak.

Në anën tjetër, vetëm 3.9 për qind e kompanive presin reduktim të vendeve të punës. Kjo përqindje është ulur me 0.9 pikë përqindjeje.

Si rezultat, treguesi i perspektivës së punësimit është përmirësuar lehtë, duke arritur në 1.04 pikë.

/albinfo.ch/

---