Zvicër: Lehtësohet qasja në vaksina, vaksinimi i detyrueshëm vetëm si masë e fundit

(KEYSTONE/Georgios Kefalas)

Këshilli i Shteteve në Zvicër ka mbështetur ndryshimet në Ligjin për Epidemitë, me synimin që vendi të jetë më i përgatitur për epidemitë e ardhshme dhe të nxjerrë mësime nga pandemia e COVID-19.

Një nga ndryshimet kryesore lidhet me vaksinimin. Në të ardhmen, qytetarët pritet të kenë qasje më të lehtë në vaksinim dhe këshillim në farmaci në të gjitha kantonet. Megjithatë, cilat vaksina do të ofrohen në farmaci do të vendoset nga kantonet dhe jo çdo farmaci do të jetë e detyruar t’i ofrojë të gjitha vaksinat.

Këshilli i Shteteve kërkon gjithashtu që vaksinimi i detyrueshëm të përdoret vetëm si masë e fundit dhe të jetë i kufizuar në kohë. Sipas propozimit, personat që nuk respektojnë një masë të tillë nuk duhet të gjobiten.

Ndryshimet parashikojnë edhe një qasje më të kujdesshme ndaj masave të tjera gjatë epidemive, si mbyllja e shkollave apo puna e detyrueshme nga shtëpia. Synimi është që kufizimet ndaj jetës ekonomike dhe shoqërore të jenë sa më të kufizuara dhe të zgjasin sa më pak.

Rishikimi i Ligjit për Epidemitë tani pritet të shqyrtohet nga Këshilli Kombëtar i Zvicrës, para se të vazhdojë procedura e mëtejshme parlamentare.