Zjarret në Evropë shkaktuan dëme mbi 3 miliardë euro gjatë këtij viti

Keystone (AP Photo/Emma Da Silva)

Zjarret masive dhe temperaturat ekstreme që kanë përfshirë disa vende evropiane, përfshirë Francën, Spanjën, Portugalinë, Greqinë dhe Rumaninë, kanë sjellë dëme ekonomike që tejkalojnë 3 miliardë euro që nga fillimi i vitit, sipas një analize të publikuar nga “Financial Times”.

Kjo situatë tregon ndikimin në rritje të ndryshimeve klimatike dhe pasojat e tyre ekonomike në kontinent. Vetëm gjatë dy muajve të parë të sezonit të zjarreve janë shkatërruar rreth 500 mijë hektarë pyje dhe sipërfaqe të tjera tokësore.

Në pesë vendet e eurozonës më të prekura, humbjet ekonomike llogariten në rreth 3,1 miliardë euro, një shifër që tejkalon mesataren vjetore të vlerësuar më herët nga Komisioni Evropian për dëmet e shkaktuara nga zjarret në të gjithë Bashkimin Evropian.

Përllogaritjet bazohen në metodologjinë e Komisionit Evropian dhe në të dhënat e autoriteteve franceze, duke përfshirë kostot për rehabilitimin e zonave të prekura dhe rikthimin e tyre pas shkatërrimit nga flakët.

Megjithatë, ekspertët paralajmërojnë se dëmet reale mund të jenë shumë më të mëdha, pasi në këto llogaritje nuk përfshihen humbjet nga ndërprerja e veprimtarisë ekonomike, dëmtimet e infrastrukturës, pasojat në turizëm, bujqësi dhe ndikimi në shëndetin e qytetarëve.

Me vazhdimin e sezonit të zjarreve dhe temperaturave të larta në disa rajone të Evropës, autoritetet mbeten në alarm për rrezikun e përhapjes së mëtejshme të flakëve.