Zbulohet skema e pastrimit të parave të drogës përmes agjencisë së udhëtimit, arrestime në Zvicër e Shqipëri

(KEYSTONE/Gian Ehrenzeller).

Një rrjet i gjerë i trafikut të kokainës me lidhje mes Zvicrës dhe Shqipërisë është goditur nga autoritetet gjyqësore në të dyja vendet, pas hetimeve disa mujore që zbuluan një skemë të sofistikuar të pastrimit të parave të drogës, shkruan 20minuten, transmeton albinfo.ch.

Klanit ballkanik, që dyshohet se ka shpërndarë kokainë në të gjithë Zvicrën, i janë konfiskuar prova të shumta për një sistem informal të transferimit të parave me qendër në qytetin zviceran të Lucernës. Fitimet nga aktivitetet kriminale dyshohet se janë pastruar përmes një agjencie udhëtimesh me degë në Bazel dhe Kosovë.

Sipas të përditshmes “Aargauer Zeitung”, hetimet kanë çuar në arrestimin e gjashtë personave në Zvicër që nga shtatori i kaluar, përfshirë edhe të ashtuquajturin “shef zviceran” të bandës, i identifikuar si EF, i cili mbetet në paraburgim.

Gjatë fundjavës, Zyra e Prokurorisë Speciale Kundër Korrupsionit dhe Krimit të Organizuar në Shqipëri (SPAK) ka kryer arrestimin e dy personave të tjerë, të cilët dyshohet se janë drejtues të tjerë të klanit. Emrat e tyre nuk janë bërë publik zyrtarisht, por media investigative shqiptare “Prapaskena” ka zbuluar identitetin e tyre, duke përfshirë një bashkëpunëtor të ngushtë të EF, të njohur si PK, një figurë e njohur në rrjetet e kontrabandës.

Sipas SPAK, të dyshuarit EF, BF dhe PK – në bashkëpunim me individë të tjerë nga Lucerna – kanë ngritur dhe operuar një sistem informal të transferimit të parave që përfshinte shuma të mëdha të fituara nga shitja e drogës në Zvicër dhe më tej të dërguara në Shqipëri, transmeton albinfo.ch.

Paratë e drogës dorëzoheshin nga dërguesit në Zvicër te bashkëpunëtorët lokalë, të cilët më pas njoftonin partnerët në Tiranë për shumën dhe marrësin. Në fund, paratë u dorëzoheshin përfituesve në Shqipëri, nën mbikëqyrjen e drejtpërdrejtë të EF, BF dhe PK. Hetuesit dyshojnë se bëhet fjalë për transferta në vlerë prej disa miliona eurosh.

Disa nga të arrestuarit, përfshirë pronarin e agjencisë së udhëtimit dhe dy djemtë e tij, kanë paraqitur ankesa kundër paraburgimit. Zyra e Prokurorit Federal në Zvicër nuk ka pranuar të japë detaje të mëtejshme për këtë çështje, duke konfirmuar vetëm bashkëpunimin me autoritetet shqiptare.

Ndërkohë, SPAK njoftoi se hetimet janë ende në zhvillim dhe se do të ketë edhe masa të tjera, transmeton albinfo.ch.