“Votoni ligjin”: Protestuesit mbushin sërish sheshin “Skënderbeu”

Protestuesit janë rikthyer edhe sot para Kuvendit të Kosovës, duke kërkuar miratimin në lexim të dytë të ndryshimeve në Ligjin për Dhomat e Specializuara. Deri tani nuk është bërë e ditur se kur do të mbahet seanca e radhës e Kuvendit.

Protesta për ndryshimin e Ligjit për Dhomat e Specializuara të Kosovës ka vazhduar edhe sot në Prishtinë, ku një numër i konsiderueshëm qytetarësh janë mbledhur në sheshin “Skënderbeu”, pranë objektit të Kuvendit, transmeton albinfo.ch.

Me thirrjen “Votoni ligjin”, protestuesit po kërkojnë nga deputetët që të përfundojnë procedurën e miratimit të ndryshimeve ligjore, të cilat të hënën u miratuan në lexim të parë me 91 vota.

Protesta e sotme zhvillohet në një ditë veçanërisht të rëndësishme për institucionet e Kosovës, pasi sot skadon edhe afati kushtetues për zgjedhjen e presidentit të ri.

Ndërkohë, Kuvendi i Kosovës ende nuk ka njoftuar për mbajtjen e një seance të re, në të cilën do të mund të procedohej votimi në lexim të dytë i ndryshimeve në Ligjin për Dhomat e Specializuara. Edhe mëngjesin e sotëm nuk ishte paralajmëruar ndonjë seancë e re apo mbledhje e komisioneve parlamentare.

Protestuesit kanë qëndruar në zonën përreth Kuvendit, ndërsa kërkesa e tyre mbetet e njëjtë: deputetët ta votojnë ligjin pa vonesa të mëtejshme.

Situata politike në vend mbetet e ndërlikuar, pasi paralelisht me kërkesën për votimin e ligjit, partitë politike ende nuk kanë arritur marrëveshje për zgjedhjen e presidentit./Albinfo.ch

---