Vigan Berisha viziton artistin e njohur, Arsim Berisha në Zvicër

U vlerësua puna e z. Berisha si një shembull i angazhimit të mërgatës në ruajtjen e identitetit tonë kombëtar dhe në afirmimin e kulturës shqiptare në skenën ndërkombëtare

Shefi i Misionit Konsullor të Republikës së Kosovës në Zvicër, z. Vigan Berisha, zhvilloi një vizitë në atelienë e z. Arsim Berisha, artist, piktor dhe koreograf shqiptar që jeton dhe vepron në Zvicër.

Z. Berisha është një emër i njohur i mërgatës sonë në fushën e artit dhe të koreografisë, i cili përmes krijimtarisë së tij ndër vite ka kontribuar në ruajtjen dhe promovimin e identitetit kombëtar në hapësirën zvicerane dhe më gjerë, shkruan albinfo.ch.

Që nga viti 1991, ai është pjesë aktive e jetës artistike në Zvicër, ku me pasion e profesionalizëm ka ndërtuar një karrierë të spikatur në pikturë, art mural, skenografi dhe vallëzim artistik. Aktualisht drejtues i Studios Artistike “FENIX”, z. Berisha ka udhëhequr me përkushtim programe të shumta kulturore e skenike, duke përfaqësuar me dinjitet mërgatën shqiptare në festivale dhe aktivitete kulturore ndërkombëtare.

Veprimtaria e tij në artin figurativ përfshin një numër të konsiderueshëm ekspozitash personale dhe kolektive në qendra të ndryshme të artit në Zvicër dhe në vende të tjera të Evropës, të cilat kanë tërhequr interes të gjerë nga publiku dhe adhuruesit e artit.

Krijimtaria e tij shquhet për stilin origjinal dhe për pasqyrimin e thellë të shpirtit dhe emocioneve njerëzore përmes ngjyrës, formës dhe lëvizjes.

Në takim u shkëmbyen mendime mbi rolin e artit dhe të krijuesve mërgatë, si dhe mbi rëndësinë që ka kultura si urë lidhëse ndërmjet mërgatës dhe institucioneve të Republikës së Kosovës.

U vlerësua puna e z. Berisha si një shembull i angazhimit të mërgatës në ruajtjen e identitetit tonë kombëtar dhe në afirmimin e kulturës shqiptare në skenën ndërkombëtare.

 

 

---