Valbona Gashi prezanton “Gjurmët në Medalion” në Gjenevë dhe Bernë

Ekspozita personale e Valbona Gashit në Konsullatën e Kosovës në Gjenevë dhe Ambasadën në Bernë

Artistja e njohur Valbona Gashi shënoi hapjen e dy ekspozitave personale të saj me titullin “Gjurmët në Medalion”, të cilat u organizuan respektivisht në Konsullatën e Përgjithshme të Republikës së Kosovës në Gjenevë dhe në Ambasadën e Republikës së Kosovës në Bernë, shkruan albinfo.ch.

Në Gjenevë, ekspozita paraqiti një përzgjedhje veprash të realizuara me mjeshtëri, duke përfshirë medalione dhe piktura ku motivet tradicionale ndërthuren me qasje bashkëkohore, duke rikthyer simbolikën e pasur kulturore shqiptare në një interpretim modern. Atmosferën e mbrëmjes e pasuroi violonçelistja Laura Goga, e cila me interpretimin e saj krijoi një ambient solemn dhe i dha hapjes së ekspozitës një dimension të veçantë artistik.

Në fjalën e saj, udhëheqësja e Konsullatës së Përgjithshme, Floreta Kabashi, falënderoi të pranishmit dhe theksoi angazhimin e vazhdueshëm të institucionit për promovimin e vlerave kulturore të Kosovës në Gjenevë. Konsullata shprehu mirënjohje për artisten Gashi, violonçelisten Goga dhe të gjithë pjesëmarrësit që e bënë këtë mbrëmje një sukses të vërtetë kulturor.

Ndërkohë, në Bernë, ekspozita u organizua me rastin e 28 Nëntorit, Ditës së Flamurit Kombëtar, përkujtimit të daljes së parë publike të UÇK-së dhe ditëlindjes së Adem Jasharit. Mbrëmja u hap me interpretimin e Gentiana Tafilajt, e cila intonoi Himnin e Kosovës, ndërsa Kori Lulekuqet solli një atmosferë të ngrohtë dhe festive me këngë heroike dhe Himnin Kombëtar. Ndërkohë, Oliver Dushi me lahutën e tij solli interpretime kushtuar Skënderbeut, duke i dhënë ngjarjes ndjesinë e krenarisë dhe lidhjes me rrënjët tona.

Atmosfera e mbrëmjes u përjetua si një moment i veçantë bashkimi, arti dhe vlerësimi për kulturën shqiptare. Punimet e artistes do të jenë të ekspozuara edhe në ditët në vijim, duke ofruar mundësi të mëtejshme për publikun që të njohë veprat e saj.

Lexoni po ashtu:

Ekspozita personale “Gjurmët në Medalion” e Valbona Gashit hapet në Konsullatën e Kosovës në Gjenevë

---