Valais synon të lejojë vrasjen e rrëqebujve, për herë të parë në Zvicër

Për herë të parë në Zvicër kërkohet lejimi i vrasjes së rrëqebujve

Kantoni i Valais po përgatit një kërkesë zyrtare për të rregulluar popullatën e rrëqebullit përmes lejimit të gjuetisë së tij, një hap që do të ishte i pari i këtij lloji në Zvicër, përcjell albinfo.ch.

Sipas autoriteteve kantonale, shqetësimi kryesor lidhet me rënien e numrit të kafshëve të egra, veçanërisht kaprojve dhe dhive të egra. Disa vrojtues të faunës dyshojnë se shtimi i rrëqebujve dhe ujqërve mund të ketë ndikuar në pakësimin e tyre.

Presidentja e Shoqatës së Gjuetarëve të Valais-it të Epërm, Alexandra Lengen, tha se janë shtuar rastet e vëzhgimit të rrëqebujve në rajon, megjithëse theksoi se rënia e numrit të kafshëve të egra nuk mund t’i atribuohet vetëm këtij grabitqari.

Sipas Fondacionit Kora, që merret me monitorimin e grabitqarëve të egër në Zvicër, numri i rrëqebujve në Valais është rritur ndjeshëm vitet e fundit. Në Valais-in e Epërm, nga vetëm tre individë të regjistruar në vitin 2020, tani numërohen të paktën 13. Ndërsa në Valais-in e Poshtëm, popullata është rritur nga rreth 20 në vitin 2017 në më shumë se 40 disa vite më vonë.

Megjithatë, organizatat për mbrojtjen e natyrës kundërshtojnë idenë e gjuetisë. Drejtori i Pro Natura Valais, Jérémy Savioz, thekson se rrëqebulli vazhdon të jetë një specie e rrezikuar në Zvicër dhe se nuk ka prova shkencore që e lidhin atë me rënien e numrit të kaprojve.

Rrëqebulli figuron në Listën e Kuqe të gjitarëve të rrezikuar në Zvicër, ndërsa autoritetet federale do të duhet të shqyrtojnë kërkesën e Valais-it nëse ajo dorëzohet zyrtarisht. /Albinfo.ch

---