Tragjike, burri i mërgimtares shqiptare vret djalin 10 vjeç me thikë

Markus Spiske

Mediat italiane shkruajnë se një 44-vjeçar polak i ka marrë jetën djalit të tij 10-vjeçar, nëna e të cilit është shqiptare, e moshës 32 vjeçe, transmeton albinfo.ch.

Djali, i quajtur Mattias, është vrarë nga i ati ditën e djeshme në Itali, në Cura di Vetralla, në provincën e Viterbos.

Babai me inicialet M.T., roje sigurie në një spital të zonës, e  vrau të miturin duke i prerë fytin me thikë kuzhine, ndërkohë që Gjykata e Viterbos kishte vendosur që 44-vjeçari të mos i afrohej banesës pas ndarjes së çiftit.

Referuar mediave italiane, shkaku i divorcit ishte dhuna sistematike që 44-vjeçari kishte ushtruar ndaj shqiptares.

Thuhet se fëmija u kthye në banesë pas shkolle rreth orës 13.30, i shoqëruar nga një i afërm i tij, por nuk dihet ende se si i ati i tij ka arritur të hyjë në banesë ku kreu dhe krimin.

Shqiptarja M.R., 32 vjeçe, e gjeti djalin e saj të pajetë në dysheme kur u kthye në banesë nga puna, rreth orës 15.30. Burri ishte në një dhomë tjetër. Ky i fundit u arrestua nga policia. Karabinierët po dëgjojnë dëshmitarët për të rindërtuar atë që ndodhi në banesën e një pallati dykatësh. /Albinfo.ch