Tragjedi në Ticino: 50-vjeçari humb jetën në aksident gjatë punës në pyll

Punëtori u godit fillimisht nga një pemë dhe më pas u zuri një tjetër gjatë punimeve në pyll në rajonin e Locarnos

Një aksident i rëndë pune ka ndodhur të martën pasdite në Cugnasco, në zonën malore të kantonit Ticino, ku një punëtor pyjor ka humbur jetën gjatë kryerjes së detyrës, përcjell albinfo.ch.

Sipas policisë, 50-vjeçari me origjinë bullgare po kryente punime në pyll kur, për arsye ende të paqarta, fillimisht u godit nga një pemë, ndërsa më pas një tjetër pemë ra mbi të.

Në vendngjarje ndërhynë forcat e policisë kantonale, zjarrfikësit e Locarnos, si dhe ekipet e shpëtimit malor të Swiss Alpine Rescue dhe helikopteri i shpëtimit REGA.

Pavarësisht përpjekjeve për reanimim, autoritetet konfirmuan vdekjen e punëtorit në vendin e ngjarjes. Hetimet për të sqaruar shkaqet e aksidentit janë duke vazhduar./Albinfo.ch

---