Temperaturat rekord po arrijnë edhe majat më të larta të Zvicrës

Vala e të nxehtit nuk po kursen as Alpet, ndërsa në Jungfraujoch u regjistrua temperatura më e lartë në histori

Temperaturat ekstreme që kanë përfshirë Zvicrën nuk po prekin vetëm ultësirat, por edhe zonat alpine, ku janë thyer rekorde historike të nxehtësisë.

Në stacionin meteorologjik të Jungfraujoch, në një lartësi prej 3,571 metrash mbi nivelin e detit, termometri arriti 8 gradë Celsius, duke vendosur një rekord të ri absolut për këtë zonë. Rekordi i mëparshëm prej 7.8 gradësh ishte regjistruar në vitin 2009, transmeton albinfo.ch.

Sipas MeteoSwiss, rritja e temperaturave në lartësi të mëdha është një tjetër tregues i ndikimit të ndryshimeve klimatike, të cilat po prekin edhe rajonet që tradicionalisht kanë pasur klimë të ftohtë gjatë gjithë vitit.

Ekspertët paralajmërojnë se ngrohja e zonave alpine mund të përshpejtojë shkrirjen e akullnajave, të ndikojë në ngricën e përhershme (permafrost) dhe të rrisë rrezikun e rrëshqitjeve të dheut dhe shembjeve të shkëmbinjve. Po ashtu, ndryshimet e temperaturës mund të kenë pasoja edhe për ekosistemet malore, turizmin dhe burimet ujore.

Zvicra po përjeton një nga verat më të nxehta të viteve të fundit, me disa valë të të nxehtit që kanë sjellë temperatura mbi 35 gradë Celsius në shumë rajone të vendit. Autoritetet meteorologjike vazhdojnë të monitorojnë situatën dhe u bëjnë thirrje qytetarëve të tregojnë kujdes, pasi temperaturat e larta pritet të vazhdojnë edhe në ditët në vijim.

---