Të vetëpunësuarit me kualifikime të larta, 31% më pak fitim në vitin 2020

Nga ana tjetër, vetëm 5 për qind e punonjësve me kualifikim të krahasueshëm arsimor janë prekur nga rënia e të ardhurave

Të vetëpunësuarit (personat me firma private) me formim të lartë profesional ishin më të prekur financiarisht nga pandemia sesa punonjësit me të njëjtat kualifikime arsimore. Ky është rezultati i një sondazhi të ri, të realizuar nga Enti Federal i Statistikave.

Pothuajse një e treta (31 për qind) e të vetëpunësuarve të anketuar kanë deklaruar se në vitin 2020 kanë fituar më pak se sa një vit më parë, transmeton albinfo.ch. Këtë e ka bërë të ditur Zyra Federale e Statistikave (BFS) të hënën. Por, jo të gjithë të diplomuarit e vetëpunësuar kanë vuajtur shumë pandeminë. Sipas studimit të BfS, një në tetë nga ta ka pasur madje një rritje të vëllimit të porosive.

Nga ana tjetër, sipas anketës, vetëm 5 për qind e punonjësve me kualifikim të krahasueshëm arsimor janë prekur nga rënia e të ardhurave, shkruan sda.ch.

Sondazhi i BfS-së kishte në fokus ekskluzivisht personat që kishin mbaruar së fundmi trajnimin e lartë profesional (të diplomuar më 2016). Në këtë kategori përfshihen ata që kanë përfunduar provimin federal (provim profesional ose i lartë profesional) si dhe ata që janë të diplomuar nga shkollat ​​e larta teknike.

Në përgjithësi, grupi i ekzaminuar rezulton të ketë qenë i kërkuar në tregun e punës edhe gjatë pandemisë, përcjell albinfo.ch. Në fund të vitit 2020, shkalla e tyre e papunësisë ishte 1.4 për qind. Nëse merren parasysh të gjithë personat e punësuar me një kualifikim përkatës arsimor, norma ishte 2.5 për qind.

Në gjithë Zvicrën, shkalla e papunësisë ishte 4.9 për qind në tremujorin e katërt të 2020-ës.

---