Studim: Frangu i fortë u sjell kursime të mëdha zviceranëve që blejnë në vendet fqinje

Analiza tregon se ushqimet në Gjermani, Francë dhe Itali kushtojnë deri në 63% më pak se në Zvicër, falë forcimit të frangut zviceran.

Forcimi i vazhdueshëm i frangut zviceran po u sjell përfitime të konsiderueshme konsumatorëve që bëjnë blerje në vendet fqinje të Bashkimit Evropian, përcjell albinfo.ch.

Sipas një analize të re të kompanisë së shërbimeve financiare Wise, frangu është forcuar me rreth 16 për qind kundrejt euros gjatë pesë viteve të fundit, duke rritur ndjeshëm fuqinë blerëse të qytetarëve zviceranë jashtë vendit, transmeton albinfo.ch.

Aktualisht, 1 frang zviceran këmbehet me rreth 1.08 euro, çka do të thotë se blerjet në vendet e Eurozonës janë bërë edhe më të leverdishme për banorët e Zvicrës.

Studimi zbulon se disa produkte ushqimore kushtojnë deri në 63 për qind më pak në vendet fqinje:

Gjalpi (250 gramë) është rreth 63% më i lirë në Gjermani.
Një paketë me 10 vezë kushton rreth 63% më pak në Francë.
Dy kilogramë mollë Gala janë 62% më të lira në Itali.

Në përgjithësi, Gjermania rezulton destinacioni më i favorshëm për blerjet ushqimore, ku konsumatorët nga Zvicra kursejnë mesatarisht rreth 40 për qind.

Nga ana tjetër, për produktet luksoze avantazhet janë më të kufizuara. Për shembull, çanta Hermès Arçon Slim mund të blihet rreth 7% më lirë jashtë Zvicrës, ndërsa ora Omega Speedmaster Professional Moonwatch kushton rreth 200 franga më pak në Gjermani pas rimbursimit të TVSH-së.

Megjithatë, studimi thekson se pajisjet elektronike shpesh janë më të lira në Zvicër, kryesisht për shkak të normës më të ulët të TVSH-së, e cila është 8.1%, krahasuar me mesataren prej 21% në vendet e Bashkimit Evropian. /Albinfo.ch

---