Statistika e refugjatëve në Zvicër për muajin korrik 2018

Në muajin korrik, në Zvicër janë parashtruar 1.374 parashtresa për azil, që paraqet një rënie prej 18.9 për qind krahasuar me muajin korrik të vitit të kaluar (-320 parashtresa).

(AP Photo/Bernat Armangue)

Krahasuar me qershorin 2018, kjo shifër paraqet një rritje prej 10.3 për qind (+128 parashtresa). Në muajin korrik, numri i migrantëve që kanë ardhur në bregdetin italian mbeti në një nivel shumë të ulët (pothuajse 2.000 persona).

Nga ana tjetër, numri i zbarkimeve në Spanjë është rritur (rreth 10.000 persona). Për disa muaj, Zvicra nuk ka qenë vendi i parë i destinacionit për emigrantët që vijnë në Europë, por më tepër kanë ardhur në Spanjë, Itali apo Greqi.

Në muajin korrik, Sekretariati shtetëror për migrim (SEM) ka përpunuar 2.257 parashtresa për azil në shkallë të parë. Prej këtyre, 382 rezultuan me një vendim pa hyrje (322 në bazë të Marrëveshjes së Dublinit), 620 personave iu është dhënë azil dhe 765 janë pranuar përkohësisht.

Numri i aplikimeve në pritje të shkallës së parë është 15.002; që ka shënuar rënie prej 735 parashtresash në krahasim me muajin e kaluar.

Vendet kryesore të origjinës së parashtruesve në muajin korrik në Zvicër mbeten Eritrea me 260 parashtresa, 38 më shumë se në qershor 2018 dhe Siria (145 parashtresa, +33). Pastaj vijnë Turqia (117 parashtresa, +62), Afganistani (115 parashtresa, -7) dhe Iraku (72 parashtresa, +34).

Gjithashtu në muajin korrik, 616 persona u larguan nga vendi nën kontrollin e autoriteteve. Zvicra i ka kërkuar shteteve të tjera të Dublinit të marrin mbi 537 parashtrues, prej të cilëve 163 janë transferuar. Nga ana e saj, ajo ka pranuar 541 parashtresa për kujdes nga shtetet e tjera të Dublinit dhe 154 persona u transferuan në territorin e saj, transmeton Albinfo.ch.

Programet e risistemimit

Gjatë muajit korrik, 139 shtetas sirianë arritën në Zvicër si pjesë e programit të zhvendosjes së Zyrës së Komisionerit të Lartë të Kombeve të Bashkuara për Refugjatë (UNHCR). Këshilli Federal zviceran, në muajin dhjetor 2016 vendsoi të pranojë brenda dy vitesh një kontigjent të ri prej 2.000 viktimave të konfliktit sirian. Deri në fund të korrikut 2018, 1.135 persona janë mirëpritur në Zvicër. Ky program i kushtohet veçanërisht personave të cenuar në Siri ose në vendet fqinje, të cilave UNHCR u ka dhënë statusin e refugjatit.