Sot u jepet lamtumira e fundit kosovarëve të tragjedisë në Vjenë

Tragjedia në Austri: Viktimat nga Kosova sot përcillen për në banesën e fundit

Pajtim Bajrami dhe Asllan Musliu humbën jetën më 17 mars në një aksident në vendin e punës, ndërsa trupat e tyre tashmë janë kthyer në Kosovë

Një ngjarje e rëndë ka tronditur diasporën kosovare në Austri, ku një aksident tragjik në vendin e punës u mori jetën katër personave, tre prej të cilëve janë nga Kosova, shkruan albinfo.at.

Sipas informacioneve të konfirmuara përmes njoftimeve mortore familjare, Pajtim (Hakif) Bajrami, 36 vjeç, dhe Asllan (Rexhep) Musliu, 48 vjeç, kanë ndërruar jetë më 17 mars 2026, si pasojë e këtij aksidenti fatal.

Pas procedurave në Austri, trupat e pajetë të viktimave janë nisur mbrëmjen e kaluar drejt vendlindjes, ku do t’u jepet lamtumira e fundit nga familjarët, miqtë dhe bashkëqytetarët e tyre.

Ceremonia e varrimit për të ndjerin Pajtim Bajrami do të mbahet më 21 mars 2026, në ora 16:00, në varrezat e familjes Bajrami. Po ashtu edhe për të ndjerin Asllan Musliu, varrimi do të zhvillohet po ashtu më 21 mars 2026, në varrezat e qytetit të Prizrenit, ndërsa namazi i xhenazes do të falet në xhaminë e Bajraklisë.

Ndërkohë, viktima e tretë, Istref Zekaj është mërgimtari nga fshati Mojstri i Istogut, trupi i të cilit është sjellur në Kosovë, por që nuk ka ende një njoftim zyrtar për ceremoninë e varrimit.

Kjo tragjedi ka ngjallur reagime dhe dhimbje të thellë jo vetëm te familjarët, por edhe në opinionin publik, duke rikthyer vëmendjen te kushtet e sigurisë në vendet e punës, veçanërisht për punëtorët në mërgim.

Autoritetet përkatëse në Austri pritet të zbardhin rrethanat e plota të aksidentit, ndërsa familjet e viktimave përballen me dhimbjen e madhe për humbjen e më të dashurve të tyre./Albinfo.at

---