Sllovakia shtrëngon masat ndaj koronavirusit

Sllovakia ka shtrënguar sërish masat ndaj Covid -19. Që nga dita e parë e Vitit të Ri e tutje, njerëzit në Sllovaki nuk lejohen të takojnë persona nga familje të tjera.

Sipas agjencive të lajmeve sllovake, gjatë një takimi të kabinetit qeveritar në Bratislavë u vendos për masa më të rrepta. Sllovakët do të kanë mundësinë e daljes vetëm në raste të jashtëzakonshme. Përndryshe këto masa fillimisht do të zgjasin deri me 24 janar, transmeton albinfo.at.

“Fatkeqësisht këto ditë kemi shumë vizita të njëri-tjetri, veçanërisht duhet të ndalohen vizitat nëpër spitale”, ka thënë kryeministri Igor Matoviç.

Në Sllovaki hotelet nuk lejohen më të pranojnë mysafirë të rinj, zonat e skijimit duhet të mbyllen.

Që nga fillimi i pandemisë në Sllovaki ka pasur 179,543 infeksione me Covid – 19 dhe 2,138 vdekje të konfirmuara.

Sllovakia ka rreth 5.5 milion banorë.