Skitarja Colturi është gati të bëjë histori me Shqipërinë

Blick: Lara Colturi synon medaljen e parë olimpike për Shqipërinë

Skitarja e re Lara Colturi, 18 vjeç, e lindur në Itali, por që përfaqëson tani Shqipërinë, mund të bëhet protagoniste e një momenti historik: medalja e parë për vendin nga Lojërat Olimpike Dimërore, transmeton albinfo.ch.

Colturi ka një karrierë të shkëlqyer në skijimin alpin, me dy vende të dyta dhe një vend të tretë gjatë sezonit të kaluar, duke treguar talent të jashtëzakonshëm dhe qëndrueshmëri në gara. Përveç aftësive teknike, ajo është e mbështetur fuqishëm nga nëna dhe trajnerja e saj, Daniela Ceccarelli, kampione olimpike në Super-G në vitin 2002, dhe tani nga trajneri i ri Alessandro Schiasselloni.

“Përfaqësimi i Shqipërisë është një gjë shumë pozitive. Federata nuk ka traditë në skijim, por më mbështet jashtëzakonisht. Do të isha shumë e kënaqur nëse mund të frymëzoja skiatorë dhe tifozë të rinj shqiptarë”, tha Colturi.

Përgatitjet e saj gjatë verës dhe bashkëpunimi me një ekip prej shtatë trajnerësh, përfshirë konsultime me yllin e skijimit Lara Gut-Behrami, e kanë bërë Colturin të gatshme për sfidat e sezonit të ardhshëm, duke përfshirë garën hapëse në Solden të Austrisë.

Përveç skijimit, Lara Colturi ka përvojë edhe në patinazh artistik, një talent që, sipas saj, e ndihmon në stabilitet dhe rehati në shtigjet e akullta.

Nëse ia del, Colturi mund të shënojë një kapitull të ri në historinë sportive të Shqipërisë, duke i dhënë vendit një yll të ri olimpik dhe duke frymëzuar gjeneratat e reja të sportistëve shqiptarë. /Blick

---