Si të zgjidhni mishin e freskët: Kujdes me ngjyrën dhe pamjen

pixabay

Zgjedhja e mishit të freskët kërkon vëmendje të veçantë, veçanërisht kur bëhet fjalë për produkte të paketuar. Ekspertët këshillojnë konsumatorët që, përveç leximit të etiketës, t’i kushtojnë rëndësi të madhe edhe ngjyrës dhe strukturës së mishit.

Sipas Elisabeth Roesicke nga Qendra Bujqësore Gjermane, mishi cilësor për skarë duhet të përmbajë dhjamë intramuskular, i cili i jep shije dhe butësi. Prania e vijave të bardha që i ngjajnë venave është një tregues pozitiv.

Megjithatë, ka disa shenja që paralajmërojnë se mishi mund të mos jetë i freskët. Nëse mishi qëndron në një lëng të përgjakur brenda paketimit, kjo sugjeron se produkti është i vjetër. Po ashtu, ngjyra e mishit është një tregues kyç: viçi duhet të jetë me ngjyrë të kuqe të lehtë, pula duhet të jetë e çelët, ndërsa mishi i derrit duhet të jetë rozë e zbehtë. Çdo nuancë gri apo e errët është një shenjë për t’u shmangur.

Një metodë e thjeshtë për të testuar freskinë është edhe shtypja me gisht: nëse mishi nuk rikthehet në formën e tij të parë dhe mbetet i gropuar, atëherë nuk është i freskët. Gjithashtu, sipërfaqja e mishit duhet të jetë me shkëlqim, jo e errët apo e thatë.

Ekspertët rekomandojnë që blerësit të mos neglizhojnë këto tregues vizualë, të cilët shpesh vlejnë më shumë se data e skadencës në paketim.