Shqipëria, tregti e lirë edhe me 4 vende të EFTA-s

Prej dy muajsh ka hyrë zyrtarisht në fuqi një marrëveshje e tregtisë së lirë që heq barrierat tregtare mes Shqipërisë dhe katër vendeve të zonës EFTA, si Zvicra, Islanda, Norvegjia dhe Lihtenshtajni.

“Në vitin 2010 eksportet përbënin 4.2 për qind të totalit, duke treguar potencialin për të eksportuar më shumë. Kjo marrëveshje do të krijojë më shumë mundësi për të rritur eksportet në vende të tjera”, ka deklaruar ministri i Ekonomisë, Nasip Naço.

Në dy vjet eksportet shqiptare drejt 4 vendeve të EFTA-s janë rritur me mbi 15 herë, duke arritur në 50 milionë dollarë. Ambasadorja zvicerane në Tiranë, Ivana Enzler tha se tregtia e lirë do jetë në përfitim të të dyja palëve.

“Vendet e EFTA-s kanë lidhje të shkëlqyera me Shqipërinë. Qëllimi i këtij seminari është të shohë mundësitë e reja se si bizneset shqiptare mund ta shfrytëzojnë sa më mirë këtë marrëveshje për të përfituar nga ajo. Sidomos ato të sektorit të bujqësisë, në të cilin Shqipëria ka një potencial të madh”, ka pohuar Enzler, transmeton TCH.

Shqipëria eksporton drejt vendeve të EFTA-s kryesisht produkte të industrisë së fasonit dhe importon makineri, duhan e produkte farmaceutike.