Shqipëria ndër vendet evropiane me nivelin më të ulët të obezitetit

@unsplash

Obeziteti po konsiderohet gjithnjë e më shumë si një problem serioz për shëndetin publik në Europë, por Shqipëria vazhdon të renditet ndër vendet me përqindjen më të ulët të personave obezë.

Të dhënat e Eurostat për vitin 2022 tregojnë se 12.6% e qytetarëve shqiptarë mbi 18 vjeç rezultojnë obezë. Kjo shifër është më e ulët se mesatarja e Bashkimit Europian, e cila është 16.3%, si dhe nën nivelet e raportuara në shumicën e vendeve të rajonit.

Në Ballkanin Perëndimor, një normë më të ulët se Shqipëria regjistron vetëm Mali i Zi, me 7.8%. Ndërkohë, Bosnja dhe Hercegovina, Maqedonia e Veriut dhe Serbia kanë përqindje më të larta të obezitetit tek të rriturit. Në nivel europian, Malta mban shifrën më të lartë, me 26.6% të popullsisë së rritur të klasifikuar si obeze.

Sipas Eurostat, fenomeni i obezitetit në vendet e Bashkimit Europian po zgjerohet. Rreth 16.3% e të rriturve janë obezë, ndërsa më shumë se gjysma e popullsisë përfshihet në kategorinë e personave me mbipeshë ose obezitet.

Ekspertët argumentojnë se rritja e rasteve lidhet me mënyrën moderne të jetesës, që karakterizohet nga më pak aktivitet fizik, qëndrimi i gjatë ulur dhe ndryshimet në mënyrën e ushqyerjes. Klasifikimi i obezitetit bëhet përmes Indeksit të Masës Trupore (BMI), ku një vlerë 30 ose më e lartë konsiderohet tregues i obezitetit.