Shqipëria, me bilanc negativ, më shumë vdekje se sa lindje

(KEYSTONE/Gaetan Bally)

Numri i lindjeve për 3 muajt e parë të vitit 2022 ka shënuar një rënie, duke bërë që bilanci lindje-vdekje të jetë negativ.

Në periudhën janar, shkurt dhe mars kanë ardhur në jetë rreth 6 mijë bebe.

Ndërkohë numri i vdekjeve për të njëjtin 3-mujor 2022 ishte afro 8 mijë.

Sipas të dhënave të INSTAT, në tremujorin e parë janë 1.882 vdekje më shumë se sa lindje.

Tirana është qarku me lindjet më të shumta, duke qenë bashkë me Kukësin të vetmit qarqe në vend me më shumë lindje se sa vdekje.

Bilancin më negativ e kanë qarku i Korçës dhe Fierit, të cilat kanë pasur më shumë vdekje.

Në vitin 2021, Shqipëria shënoi për herë të parë një rekord negativ. Vitin e kaluar pati mbi 3 mijë vdekje më shumë se sa lindje.