Shqipëria i refuzon nënshtetësinë xhudistes kosovare, e lë jashtë garave ndërkombëtare

Tajneri i ekipit të Kosovës në xhudo Driton Kuka përmes një statusi në rrjete sociale ka bërë të ditur se presidenca e Shqipërisë e ka refuzuar xhudisten nga Kosova Laura Fazliu që të marrë nënshtetësinë e Shqipërisë.

Si pasojë e kësaj, para disa muajsh Laura nuk kishte pasur mundësi të udhëtonte me ekipin në Azerbajxhan për shkak të pasaportës, njoftoi Kuka, përcjell albinfo.ch.

“Përkundër që nga Ministria Brendshme dhe Ministria e Arsimit dhe Sportit mori miratimin, ajo nga ekspertë të Presidencës Shqiptare u refuzua për shtetësi shqiptare! I mjerë ai që nuk e sheh një vajzë që po bën krenar çdo shqiptar kudo në botë që nuk qenka interes Kombëtar! Laura s’mundi të udhëtojë në Azerbajxhan për shkak të pasaportës muaj më parë! Faleminderit Qeverisë Shqiptare, por sinqerisht ‘ekspertët’ në Presidencë janë të mjerë”, shkruan Kuka në Facebook.