Shkolla Shqipe “Vatra” në Belgjikë shënon 21-vjetorin e themelimit

Institucioni që ruan gjuhën dhe identitetin shqiptar në diasporë mbylli vitin shkollor me një program festiv

Shkolla Shqipe “Vatra” në Belgjikë ka shënuar 21-vjetorin e themelimit, njëkohësisht me ceremoninë e mbylljes së vitit shkollor 2025-2026, transmeton albinfo.ch.

Në një atmosferë festive, nxënësit prezantuan këngë, recitime dhe valle tradicionale shqiptare, ndërsa aktiviteti u përmbyll me shpërndarjen e dëftesave.

Gjatë ceremonisë u vlerësua puna e mësueseve dhe bashkëpunëtorëve të shkollës, si dhe mbështetja e vazhdueshme e prindërve, institucioneve shqiptare dhe komunitetit në Belgjikë.

Një rol të rëndësishëm në zhvillimin e shkollës ndër vite është vlerësuar se ka dhënë kryetari i Shoqatës “Vatra”, Amet Gjana, përmes angazhimit të tij në promovimin e arsimit, kulturës dhe identitetit shqiptar në diasporë.

Prej më shumë se dy dekadash, Shkolla Shqipe “Vatra” mbetet një nga institucionet më të rëndësishme të komunitetit shqiptar në Belgjikë, duke kontribuar në ruajtjen e gjuhës amtare dhe trashëgimisë kombëtare tek brezat e rinj. /Albinfo.ch

---