Shkolla Shqipe Ostermundigen Bern organizon festën e Abetares

Nxënës, prindër dhe bashkatdhetarë do të mblidhen më 20 qershor në Bern për të shënuar përfundimin e vitit shkollor 2025–2026

Shkolla Shqipe Ostermundigen Bern po organizon “Festën e Abetares”, një aktivitet tradicional që do të mbahet më 20 qershor 2026 në Ostermundigen të Bernit, me rastin e përfundimit të vitit shkollor 2025–2026, shkruan albinfo.ch.

Ngjarja do të zhvillohet në ambientet e Schule Dennigkofen, duke filluar nga ora 18:00, dhe pritet të mbledhë nxënës, prindër, mësimdhënës dhe bashkatdhetarë nga komuniteti shqiptar në Zvicër.

Organizatorët kanë njoftuar se programi do të përfshijë pika të ndryshme shkollore dhe artistike të përgatitura nga nxënësit, ndërsa pjesë e mbrëmjes festive do të jenë edhe anëtaret e Korit “Lulëkuqet Bern”.

Përmes kësaj feste synohet të promovohet gjuha shqipe, kultura kombëtare dhe ruajtja e identitetit shqiptar tek brezat e rinj që jetojnë në diasporë.

Shkolla Shqipe Ostermundigen Bern ka ftuar të gjithë prindërit, familjarët, miqtë dhe bashkatdhetarët që të marrin pjesë në këtë ngjarje, duke e kthyer atë në një festë të përbashkët të komunitetit shqiptar në Zvicër./Albinfo.ch

---