Shefi i Shtabit të KFOR-it viziton Mitrovicën, paralajmëron përshtatje të pozicionimit

KFOR-i thotë se do të ruajë praninë e dukshme dhe gatishmërinë për reagim sipas nevojës

Shefi i Shtabit të KFOR-it, gjeneral brigade Chad Daniels, ka vizituar personelin e misionit në Mitrovicë, në kuadër të procesit të përshtatjes së pranisë dhe pozicionimit të forcave në terren.

Sipas njoftimit të KFOR-it, misioni po vazhdon të përshtatë pozicionimin e tij, duke ruajtur njëkohësisht praninë e dukshme, njohjen e situatës në terren dhe kontaktin me komunitetet, përcjell albinfo.ch.

KFOR-i ka theksuar se forcat mbeten të gatshme për të reaguar nëse situata e sigurisë e kërkon.

Ndryshimi i pozicionimit është pjesë e procesit gradual të optimizimit të pranisë së KFOR-it në Kosovë, i cili po zhvillohet në bazë të vlerësimit të situatës së sigurisë.

Misioni i NATO-s ka bërë të ditur më herët se, pavarësisht ndryshimeve në praninë e përhershme në Urën e Ibrit, do të vazhdojë të mbajë prani në zonën e Mitrovicës dhe në veri të Kosovës.

 

---