SHBA miraton marrëveshjen e huas prej 302 milionë dollarësh për modernizimin e mbrojtjes shqiptare

Financimi do të përdoret për blerjen e pajisjeve ushtarake sipas standardeve të NATO-s dhe për forcimin e kapaciteteve mbrojtëse të Shqipërisë.

Shtetet e Bashkuara kanë miratuar marrëveshjen e huas prej 302 milionë dollarësh për modernizimin e Forcave të Armatosura të Shqipërisë, duke i hapur rrugë zbatimit të një prej investimeve më të mëdha në fushën e mbrojtjes në vitet e fundit, përcjell albinfo.ch.

Marrëveshja parashikon financimin e blerjes së pajisjeve dhe sistemeve ushtarake që përmbushin standardet e NATO-s. Fondet do të disbursohen në faza, në përputhje me nevojat operative të Ministrisë së Mbrojtjes së Shqipërisë dhe projektet që do të miratohen nga autoritetet amerikane.

Parlamenti i Shqipërisë e kishte miratuar këtë marrëveshje në fund të muajit korrik, ndërsa miratimi nga pala amerikane përbën hapin e radhës për nisjen e zbatimit të saj. Qeveria shqiptare e ka cilësuar marrëveshjen si një investim strategjik për forcimin e kapaciteteve mbrojtëse dhe përmbushjen e angazhimeve të vendit në kuadër të NATO-s.

Sipas marrëveshjes, financimi do të përdoret për modernizimin e pajisjeve ushtarake dhe zhvillimin e kapaciteteve në fushat tokësore, ajrore, detare, si dhe në sistemet e komunikimit, komandimit dhe sigurisë kibernetike.

---