SHBA-ja e BE-ja mbështesin ndaljen e punës për rrugën Deçan – Plavë

Reagime të shumta ka pasur lidhur me punimet në rrugën Deçan-Plavë, ku sipas zyrtarëve të Kishës Ortodokse, ndërtimi i rrugës po bëhet në zonën e mbrojtur. Edhe pse komuna i ka mohuar këto deklarata, misioni i OSBE-së ka thënë se përshëndet vendimin për ndaljen e punimeve.

Edhe ambasadori amerikan në Kosovë, Greg Delawie, doli në mbështetje të vendimit për ndalim të punimeve. Ndërprerjen e punimeve e ka mbështetur edhe Shefja e Zyrës së BE-së, Nataliya Apostolova, përcjell albinfo.ch.

Ndërkaq, shoqëria civile në Deçan, vazhdon të kërkojë zgjidhje për këtë problem.

KTV-ja ka provuar të flasë edhe të dielën me zyrtarë të komunës së Deçanit, përfshirë kryetarin Bashkim Ramosaj, por ata nuk janë përgjigjur. Përgjigje nuk kanë dhënë as në zyrën e ministrit të Infrastrukturës, Pal Lekaj.