Rritja e pagave në Kosovë, goditja më e rëndë për sektorin privat

Gërxhaliu thotë se me këto vendime, do të atakohen bizneset e ndershme.

Rritja e shpenzimeve për paga në sektorin publik shqetëson ekspertët ekonomik dhe asociacionet e bizneseve.

Eksperti i ekonomisë, Safet Gërxhaliu, thotë se kjo është goditja më e rëndë që u jepet bizneseve dhe punëtorëve në sektorin privat. Ka reaguar edhe Oda Ekonomike Amerikane e Kosovës, sipas së cilës, kjo ndikon negativisht edhe në rritjen e investimeve.

Sot për sektorin privat askush nuk lobon dhe askush nuk e mbron, ka thënë për Radio Kosovën eksperti Safet Gërxhaliu. “Dhe në këtë drejtim efektet e një vendimi të tillë për paga duhet të jetë grushti më i madh, goditja më e rëndë që i jepet sektorit privat dhe migrimit të të rinjve drejt vendeve evropiane”, tha ai, përcjell albinfo.ch.

Gërxhaliu thotë se me këto vendime, do të atakohen bizneset e ndershme.

“Përveç që do të jetë problem me fuqinë punëtore, do të ketë një radikalizëm të qasjes, në veçanti të doganave të Kosovës përballë bizneseve, sepse shumë më tepër atakohen bizneset e rregullta dhe transparente se sa ato të kriminalizuara. Nuk pranohen dëshmi, nuk pranohen faturat dhe e gjithë kjo me të vetmin qëllim, që me çdo kusht në dëm të sektorit privat të rritet buxheti dhe të hyrat për institucionet shtetërore”, tha Gërxhaliu.

E Oda Ekonomike Amerikane në Kosovë (OEAK) shqetësimet i ka shprehur përmes një komunikate.

“Oda Amerikane beson se veprimet si këto të institucioneve shtetërore, pa konsideratë për ngarkesat mbi sektorin privat, janë në kundërshtim me diskursin e zyrtarëve më të lartë të shtetit për fuqizim të sektorit privat dhe nxitje të investimeve. Ngritja e pagave për sektorin publik është goditje direkt për ndërmarrjet private, e posaçërisht për sektorin edhe ashtu të brishtë të prodhimit, por edhe për rritjen e investimeve të huaja direkte, për shkak se fuqia punëtore nuk do të mund të promovohet më tej si përparësi konkurruese e Kosovës”, thekson komunikata e OEAK-së.

---