Rregulla të reja në Aeroportin e Shkupit nga 1 shtatori

Zona "Hug & Fly" do të mund të përdoret falas vetëm një herë brenda 24 orëve, për ndalesa deri në 10 minuta

Nga 1 shtatori 2026, në Aeroportin Ndërkombëtar të Shkupit hyjnë në fuqi rregulla të reja për përdorimin e zonës “Hug & Fly”, e cila ndodhet para ndërtesës së terminalit.

Sipas njoftimit të operatorit të aeroportit, drejtuesit e automjeteve do të vazhdojnë të kenë mundësi të ndalojnë falas deri në 10 minuta për të lënë ose marrë udhëtarë, por kjo mundësi do të vlejë vetëm një herë brenda 24 orëve për të njëjtin automjet, përcjell albinfo.ch.

Hyrja dhe dalja e automjeteve do të kontrollohen përmes një sistemi automatik për njohjen e targave, me synim menaxhimin më të mirë të qarkullimit, sidomos në periudhat me fluks të shtuar të udhëtarëve.

Ndryshimi synon të shmangë qëndrimet e panevojshme të automjeteve para terminalit dhe të mundësojë qasje më të sigurt dhe më të lehtë për udhëtarët dhe personat që i shoqërojnë.

Për ata që kanë nevojë të qëndrojnë më gjatë, në dispozicion mbetet parkingu i aeroportit me rreth 1,200 vende për automjete dhe gjashtë vende për autobusë.

 

---