Rita Ora zbulon sekretin që e mban gjithmonë me vete: Më jep qetësi dhe më mbron

Këngëtarja me origjinë shqiptare thotë se një varëse me kristale e ndihmon të përballojë stresin dhe të ruajë ekuilibrin mes angazhimeve të shumta.

Këngëtarja me origjinë shqiptare, Rita Ora, ka zbuluar se mban pothuajse gjithmonë me vete një varëse të personalizuar me kristale, të cilën e konsideron burim qetësie, mbrojtjeje dhe ekuilibri në jetën e saj të përditshme.

Në një intervistë për The New York Times, artistja tregoi se varësja ishte dhuratë nga një prej shoqeve të saj më të ngushta për ditëlindjen e 34-të dhe se është krijuar posaçërisht për të, me kristale të përzgjedhura sipas nevojave të saj shpirtërore.

“Është një lloj objekti që më ndihmon të çliroj stresin dhe të ruaj energjinë time. Në këtë industri është shumë e lehtë të humbasësh ekuilibrin, ndaj kjo më ndihmon të qëndroj e përqendruar”, u shpreh Rita Ora.

Sipas saj, varësja përmban citrin për energji pozitive dhe gëzim, kuarc të tymosur për stabilitet, ametist të gjelbër dhe kuarc të pastër për forcimin e synimeve dhe vetëdijes.

Artistja pranoi se nuk është e sigurt nëse efekti i saj është psikologjik, por tha se beson në energjinë e kristaleve.

“Ndoshta është thjesht mendore, por ndihem e mbrojtur. Ndihem më e qëndrueshme. Nuk e di nëse është placebo, por besoj se këto gjëra mbajnë energji dhe energjia është reale”, tha ajo.

Rita shtoi se varësen e mban gjithmonë pranë vetes, edhe kur nuk i përshtatet veshjes.

“E vendos sa herë që mundem. Ndërroj shpesh veshjet, kështu që nëse nuk përputhet me to, e mbaj në çantë. Është gjithmonë me mua”, u shpreh këngëtarja.

Gjatë intervistës, Rita Ora foli edhe për ndikimin e traditave familjare, duke theksuar se besimet popullore kanë qenë pjesë e rritjes së saj në një familje shqiptare.

---