Rinor Ajeti, doktori shqiptar i ORL që po spikat në kongreset më të mëdha shkencore në Evropë

I vetmi shqiptar me punim shkencor në Kongresin e 97-të të Shoqatës Gjermane të Otorinolaringologjisë në Ulm, pjesëmarrës edhe në kongresin evropian CEORL-HNS në Suedi

Mjeku shqiptar Rinor Ajeti, specialist në fushën e Otorinolaringologjisë (ORL), po shënon sukses të vazhdueshëm në skenën ndërkombëtare shkencore, duke u bërë pjesë e kongreseve më prestigjioze në Evropë dhe duke përfaqësuar denjësisht profesionistët shqiptarë në mjekësi, transmeton albinfo.ch.

Në Kongresin e 97-të të Shoqatës Gjermane për Otorinolaringologji, Kirurgji të Kokës dhe Qafës, i mbajtur në Ulm të Gjermanisë, Ajeti ishte i vetmi shqiptar mes shumë autorëve dhe studiuesve gjermanë që prezantoi një punim shkencor.

Pjesëmarrja dhe prezantimi i tij në një nga ngjarjet më të rëndësishme mjekësore në Gjermani konsiderohet një arritje e veçantë, duke dëshmuar nivelin profesional dhe kontributin e tij në fushën e ORL-së.

Përveç kësaj, Rinor Ajeti ka qenë pjesë edhe e kongresit evropian CEORL-HNS (European Federation of Otorhinolaryngology – Head & Neck Surgery) në vitin 2026, i mbajtur në Gothenburg të Suedisë, një nga platformat më të rëndësishme për shkëmbimin e përvojave dhe risive në këtë fushë.

Ajeti njihet gjithashtu si autor i një numri të madh publikimesh shkencore, të botuara në revista të njohura ndërkombëtare të shëndetësisë, duke kontribuar në avancimin e njohurive dhe praktikave moderne në mjekësi.

Suksesi i tij po shihet si një shembull frymëzues për profesionistët e rinj shqiptarë dhe një dëshmi e përfaqësimit të denjë të mjekëve shqiptarë në arenën ndërkombëtare. /Albinfo.ch

---