Rekord i zi në Austri: Afro 50 mijë raste të reja me koronavirus brenda 24 orëve

E mërkura u shënua si dita më e zezë e koronavirusit që nga fillimi i pandemisë. Rreth 50 mijë raste pozitive u raportuan ditën e sotme.

Ende pa u bërë një javë nga lirimi i masave anti-Covid në Austri, numri i rasteve të reja me koronavirus është rritur tej mase, raporton albinfo.at. Në raportin e fundit të publikuar gjatë ditës së sotme, Ministria e Shëndetësisë e Austrisë ka raportuar për shifrën rekorde prej 49,432 infeksione të reja dhe 23 raste të vdekjeve. Kjo javë nuk ka qenë e lehtë as për ministrin e ri të Shëndetësisë, Johannes Rauch.

“Pa u bërë as 24 orë që nga betimi si ministër i Shëndetësisë, Rauch jo vetëm që iu desh të pezullojë vendimin për vaksinimin e detyrueshëm, por edhe të përballet me ditën më të zezë të koronavirusit”, shkruan heute.at, përcjell albinfo.at.

Ditën e djeshme janë raportuar 47,795 raste me infeksione, ndërkohë nëse e krahasojmë një javë më parë, pra e enjte, më 3 mars, numri ishte 31,566 raste dhe 36 vdekje.

Në përgjithësi, që nga fillimi i pandemisë gjithsej 15,136 persona humbën jetën nga koronavirusi në Austri.

---