Qeveria zvicerane javën tjetër vendos për zbutjet e radhës

Mbi bazë të këtij plani, duke filluar nga 8 qershori, pritet që të lejohen takimet e më shumë se pesë personave. Kjo parashihet madje edhe për takimet në restorante

Këshilli Federal planifikon që gjatë javës së ardhshme të përcaktojë detajet e hapit të tretë të hapjes ose të zbutjes së masave kundër koronavirusit, shkruan srf.ch.

Mbi bazë të këtij plani, duke filluar nga 8 qershori, pritet që të lejohen takimet e më shumë se pesë personave, transmeton albinfo.ch. Kjo parashihet madje edhe për takimet në restorante, ku aktualisht zbatohet rregulli që lejon vetëm katër persona.

Po për 8 qershor është planifikuar gjithashtu të rihapen shkollat ​​dhe qendrat e trajnimit të mëtutjeshëm (shkollat e zanatit), teatrot, kinematë, kopshtet zoologjike, kopshtet botanike, kampet, pishina hekurudhat malore dhe teleferikët.

Ndërsa nga mesi i qershorit, do të rihapen  kufijtë me Gjermaninë, Austrinë dhe Francën, përcjell albinfo.ch. Aktualisht po diskutohen po ashtu edhe rregullat në lidhje me qarkullimin ndërkufitar të njerëzve nga Italia dhe me Italinë.

Siç është shkruar tashmë, Italia ka vendosur që t`i hapë kufijtë më 3 qershor ndërsa Zvicra, që ka një linjë të gjatë kufitare me Italinë, ende nuk ka vendosur t`i përgjigjet me të njëjtën masë vendit fqinj.

---