Pushimet vjetore në Zvicër mund të rriten në pesë javë

Një propozim në Parlament synon të rrisë minimumin ligjor të pushimeve të paguara për të gjithë punonjësit

Një iniciativë e re në Parlamentin zviceran mund të sjellë një ndryshim të rëndësishëm për punëmarrësit në vend. Një mocion i paraqitur në Këshillin Kombëtar propozon që minimumi ligjor i pushimeve vjetore të paguara të rritet nga katër në pesë javë për të gjithë punonjësit.

Mbështetësit e propozimit argumentojnë se kjo masë do të përmirësonte kushtet e punës, veçanërisht për punonjësit në sektorët me paga më të ulëta, si bujqësia, duke i afruar ata me standardet që tashmë zbatohen në shumë industri të tjera. Sipas tyre, rritja e pushimeve është një çështje e drejtësisë sociale dhe e mirëqenies së punonjësve, transmeton albinfo.ch.

Nga ana tjetër, organizatat e punëdhënësve e kundërshtojnë nismën, duke paralajmëruar se një javë shtesë pushimi e paguar do të rriste kostot e punës me rreth 2% në vit dhe mund të ndikonte negativisht në konkurrueshmërinë e ekonomisë zvicerane.

Aktualisht, ligji zviceran garanton minimum katër javë pushim të paguar në vit për punonjësit e rritur dhe pesë javë për personat nën moshën 20-vjeçare, megjithëse shumë kompani ofrojnë kushte më të favorshme në kontratat e tyre.

Mocioni do të shqyrtohet në debatin parlamentar, ku deputetët do të vendosin nëse propozimi do të ecë përpara në procesin legjislativ.

---