Pse Zvicra do të rrisë koston e mishit?

Qeveria zvicerane dëshiron të rrisë kostot e mishit të importuar dhe të promovojë ushqimin me bazë bimore, si pjesë e një strategjie të re klimatike.

Drafti i “Strategjisë së Klimës për Bujqësinë dhe Ushqimin 2050”, i cili u shikua nga NZZ am Sonntag, thotë se qeveria zvicerane synon të zvogëlojë gjurmën e saj ekologjike të shkaktuar nga ushqimi me dy të tretat, shkruan The Local.

Paketa e masave synon të bindë popullatën të reduktojë konsumin e mishit, për të cilin autoritetet thonë se do të ndihmonte në mbrojtjen e klimës dhe për të qenë më i shëndetshëm.

Shumë pika të raportit janë të hapura për interpretim, por qeveria deklaron qartë se dëshiron të ndryshojë mënyrën se si kultivohet dhe konsumohet ushqimi në Zvicër.

Drafti thuhet se propozon që importi i produkteve miqësore me mjedisin të bëhet më i lirë, ndërsa produktet më pak të favorshme për klimën do të bëhen më të shtrenjta, përcjell albinfo.ch.

Kjo do të thotë, për shembull, se mishi i importuar do të bëhet më i shtrenjtë, ndërsa perimet organike nga vendet e afërta do të bëhen më të lira.

Draft raporti gjithashtu thekson se toka bujqësore zvicerane në të ardhmen duhet të përdoret kryesisht për prodhimin e drejtpërdrejtë të ushqimit për njerëzit. Për momentin, rreth 60 për qind përdoret për rritjen e ushqimit të kafshëve. Qeveria federale do të subvenciononte më shumë kultivimin e bimëve, ndërsa blegtoria do të merrte më pak para, shkruan The Local.

Strategjia e klimës u përpilua nga Zyrat Federale për Bujqësinë, Mjedisin dhe Sigurinë e Ushqimit, me shumë kontribute nga grupe të ndryshme lobimi.

Por – çuditërisht – jo të gjithë janë të emocionuar nga drejtimi që po merr qeveria. Sektori i bujqësisë në veçanti është tërhequr kundër shumë prej ndryshimeve të propozuara.

Plani pritet të prezantohet për publikun zviceran në shtator, përcjell albinfo.ch.