Pse po bie konsumimi i verës?

Konsumi i verës në Francë shënoi një rënie të lehtë, vitin e kaluar mes rritjes së çmimeve.

“Megjithatë, francezët ishin të gatshëm të shpenzonin pak më shumë për blerjet e verës”, sipas kompanisë së kërkimeve të tregut “Nielsen IQ”.

Bazuar në blerjet e produktit të verës me pakicë, mesatarisht, një familje franceze ka pirë 29 litra verë në vitin 2022.

Kjo është pak më e ulët se 30 litra e konsumuar në 2021 dhe 32 litra në 2020.

“Për familje, qytetarët francezë shpenzuan 1,6% më shumë për blerjet e verës në vitin 2022, shpenzime që u rritën në 131 € (142 dollarë), në krahasim me vitin e kaluar”, thuhet në raport, transmeton ansa, pëcjell albinfo.ch.

“Vera e ka ende vendin e saj në tryezën franceze. Megjithatë, si të gjitha produktet e tjera të konsumit masiv, ajo është prekur nga efektet e inflacionit. Francezët po konsumojnë më pak verë, pavarësisht nga ngjyra e verës”, tha analisti i “Nielsen IQ”, Nicolas Léger.

“Rreth 75% e familjeve franceze blenë verë me pakicë vitin e kaluar, duke ruajtur një nivel i qëndrueshëm që nga viti 2019”, tha ai.

Sipas të dhënave, konsumi i verës rritet në mënyrë të qëndrueshme me kalimin e moshës, ku personat mbi 65 vjeç konsumojnë rreth katër herë më shumë se ata nën 35 vjeç.

---