Pse mund t’ju duhet të mbani pasaportën tuaj kur jeni në një liqen zviceran?

Kur jeni duke lundruar me varkë ose duke shijuar sporte të tjera ujore në liqenet e Zvicrës, mund të mos mendoni se keni nevojë të mbani pasaportën ose kartën tuaj të identitetit. Por, duke pasur parasysh se kufijtë e Zvicrës kalojnë nëpër disa liqene, njerëzit janë paralajmëruar të marrin ID.

Shumë njerëz priren të harrojnë se disa nga liqenet e Zvicrës janë ‘të përbashkëta’ me vende të tjera.

Liqeni i Konstancës në veri shtrihet gjithashtu në territorin gjerman dhe austriak, liqeni i Gjenevës ose Lac Leman në frëngjisht në pjesën perëndimore të Zvicrës është pjesërisht në Francë, dhe një pjesë e liqeneve Lugano dhe Maggiore në jug ndodhen në Itali, përcjell albinfo.ch.

Kjo do të thotë se Zvicra ndan ‘kufij ujorë’ me vendet fqinje, përveç atyre alpine dhe tokësore.

Megjithatë, shumica e përdoruesve nuk i mendojnë këto liqene si trupa ujorë ndërkombëtarë dhe mendimi se atyre u nevojiten kartat e identitetit ose pasaportat e tyre nuk u hyn në mendjen e tyre ashtu siç ndodh kur kalojnë kufirin me makinë, tren ose aeroplan.

Por, nëse ata e gjejnë veten afër bregut tjetër, ata janë, për të gjitha qëllimet, në territorin e huaj.

Kjo është ajo që duhet të dini

Gjermania ka njoftuar së fundmi se po vendos kontrolle më të rrepta kufitare për të ndaluar hyrjen e emigrantëve të paligjshëm në vend.

Ndërsa kjo masë vlen kryesisht për kufijtë tokësorë, Zyra Doganore e Gjermanisë shkroi në Facebook për t’u kujtuar njerëzve në Zvicër se kur kaloni një kufi, edhe duke vozitur në liqen, detyrimet janë të njëjta si në tokë – nëse ju kërkohet, duhet të provoni identitetin tuaj dhe kombësinë, transmeton theloca.

Postimi, i publikuar në fund të shtatorit, vazhdoi duke thënë se “Liqeni i Konstancës është një kufi ujor. Njerëzit që vozisin atje duhet të kenë një kartë identiteti ose pasaportë me vete”.

Postimi gjeneroi reagime të ndryshme nga përdoruesit, duke përfshirë edhe këtë të çuditshme: “Dihet mirë se zviceranët po përpiqen të hyjnë ilegalisht në Gjermani përmes Liqenit të Konstancës për të kërkuar azil”.

Deri më tani, zyrtarët doganorë austriakë nuk kanë publikuar paralajmërime të ngjashme në lidhje me përdorimin ‘pa dokumente’ të pjesës së tyre të liqenit nga entuziastët zviceranë të sporteve ujore.

Po dy liqenet e tjerë ‘ndërkombëtarë’?

Asnjë koment nga ana ‘tjetër’ e liqenit të Gjenevës për të ditur sesi doganat franceze e trajtojnë këtë situatë.

Por, në anën e Zvicrës “nuk është e pazakontë që brigada e liqenit të kontrollojë vozitësit ose notarët në liqenin e Gjenevës”, tha policia e Vaud për platformën e lajmeve 20 Minuten.

“Nëse nuk kanë asnjë dokument mbi to, ne mund t’i identifikojmë duke përdorur bazat tona të të dhënave dhe nëse është e nevojshme, mund t’i kontrollojmë më tej në tokë. Por në të gjitha rastet, veçanërisht nëse jeni duke kaluar kufirin, është më mirë të keni një mjet identifikues. Dokumenti ju kursen kohë të gjithëve”.

Ndërkohë autoritetet e Ticino-s apo homologët e tyre në anën italiane të liqenit të Luganos nuk kanë thënë asgjë për kontrollin e kartave të identitetit në liqen, por është e arsyeshme të supozohet se të njëjtat rregulla zbatohen edhe atje.

 

---