Përmbyllet kolonia artistike “Pa Kufij“

Nëpërmes pikturave të tyre janë paraqitur para opinionit vendës dhe pjesëtarë të shumtë të diasporës me vlerat e tyre artistike dhe bukuritë e shumta të këtyre trevave shqiptare.

Kolonia e artistëve “Pa Kufij” ka bërë bashkë piktorët nga të gjitha trevat shqiptare për pesë ditë me radhë, duke filluar nga komuna e Bujanocit, për të përfunduar në Preshevë.
Nëpërmes pikturave të tyre janë paraqitur para opinionit vendës dhe pjesëtarë të shumtë të diasporës, vlerat e tyre artistike dhe bukuritë e shumta të këtyre trevave shqiptare.

Ministri i Diasporës, Ibrahim Makolli, mori pjesë në mbylljen e këtij aktiviteti të mbajtur në Preshevë, ku po ashtu është pritur nga deputetët shqiptarë në Parlamentin e Republikës së Serbisë, Shaip Kamberi dhe Riza Halimi, si dhe nga kryetari i Komunës së Bujanocit, Nagip Arifi, me të cilin u bisedua rreth bashkëpunimit të mëtejmë në projekte për diasporën shqiptare.

Në fjalën e tij përshëndetëse në Preshevë, ku edhe u përmbyll projekti i kolonisë artistike, ministri Makolli falënderoi të gjithë pjesëmarrësit e pranishëm, posaçërisht organizatorët e këtij aktiviteti, duke u bërë thirrje që nismat e tilla të vazhdojnë edhe vitet në vijim, në mënyrë që jeta kulturore e kësaj pjese të ngjallet edhe më shumë.
Ministri Makolli edhe një herë potencoi se mërgata shqiptare është një dhe e pandashme dhe si e tillë do të trajtohet gjithmonë nga ana e institucioneve të Republikës së Kosovës, thuhet në një njoftim të MeD-it.