PDK-ja e LDK-ja marrin pjesë në seancën konstituive, Aleanca e bojkoton

PDK-ja dhe LDK-ja kanë konfirmuar pjesëmarrjen në seancën e sotme, ndërsa Aleanca thotë se nuk dëshiron ta legjitimojë shkeljen e Kushtetutës

Edhe pse partitë opozitare e kanë cilësuar vazhdimisht vazhdimin e seancës konstituive si të jashtëligjshëm dhe përtej afateve kushtetuese, vetëm Aleanca ka vendosur ta bojkotojë seancën e ftuar për sot, transmeton albinfo.ch.

Dy partitë më të mëdha opozitare, Partia Demokratike e Kosovës (PDK) dhe Lidhja Demokratike e Kosovës (LDK), kanë konfirmuar pjesëmarrjen në seancë, ndonëse afati kushtetues për konstituimin e Kuvendit ka kaluar prej më shumë se 30 ditësh.

Në PDK, pjesëmarrja në seancë është lidhur edhe me 16 shtatorin, kur pritet shpallja e aktgjykimit në Hagë ndaj ish-krerëve të Ushtrisë Çlirimtare të Kosovës. Nga kjo parti kanë deklaruar se Kosova duhet ta ketë të paktën një Kuvend të konstituuar në momentin e shpalljes së vendimit.

Ndërkohë, në LDK kanë dhënë një tjetër arsyetim për pjesëmarrjen. Sipas tyre, konstituimi i Kuvendit i hap rrugë funksionalizimit të institucioneve, por edhe krijon mundësi për një qartësim juridik të situatës. Megjithatë, edhe brenda kësaj partie ka pasur zëra në favor të bojkotit.

Në anën tjetër, Aleanca, e cila ka shtatë deputetë, ka njoftuar se nuk do të marrë pjesë në vazhdimin e seancës. Arsyeja e bojkotit, sipas saj, është se nuk dëshiron të “legjitimojë shkeljen e Kushtetutës”.

Aleanca, megjithatë, nuk e ka të drejtën për postin e nënkryetarit të Kuvendit. Për konstituimin e plotë të Kuvendit duhet të zgjidhen kryetari dhe pesë nënkryetarët. Tre nga postet e nënkryetarëve u takojnë tri grupeve më të mëdha parlamentare, ndërsa dy të tjerë përfaqësuesve të komuniteteve.

Afati kushtetues për konstituimin e Kuvendit ka skaduar më 7 gusht, ndërsa seanca e fundit është mbajtur një ditë më vonë./Albinfo.ch

---