Pas 19 majit, Austria pritet t’i kthehet jetës normale

Më pak se një javë kanë mbetur deri në hapjen e madhe të gastronomisë, turizmit, kulturës dhe sportit në gjithë Austrinë.

Masat e Covid-19 do të zbuten. Por, do të vazhdohen rregullat e caktuara nga Qeveria austriake. “Numri i njerëzve të infektuar po bie, ai i atyre që janë duke u vaksinuar po rritet”,  ka thënë kancelari Kurz.

Numri i infeksioneve të reja tash e sa ditë rresht është nën 1 mijë. Austria është tani më mirë se Gjermania për incidencë shtatëditore, shkruan oe24.at.

Mirëpo, si parakusht për t’i frekuentuar këta sektorë mbeten zbatimi i “3 G-së: geimpft, getestet, genesen” (të vaksinuar, të testuar apo të rikuperuar), përcjell albinfo.at.

Gastronomia

Mbyllja e lokaleve të gastronomisë do të bëhet në orën 22:00.

Zbatimi i 3 G-së: Hyrja në këto lokale do të jetë e mundur vetëm duke zbatuar rregulloren e “3 G-së”(I testuar, vaksinuar apo i rikuperuar).

Regjistrimi: Nëse shkoni në restorante apo kafene dhe dëshironi të qëndroni më shumë se 15 minuta, atëherë regjistrimi me të dhënat tuaja, është i obligueshëm.

Hapja e plotë: Gastronomia do të hapet si brenda ashtu edhe jashtë. Brenda lokaleve të gastronomisë  në një tavolinë mund të uleni deri në katër persona (plus fëmijët), në ambientet e jashtme, pra në tarracë deri në dhjetë persona.

Marrja me vete: Të merrni ushqimin me vete nga lokalet e gastronomisë do të jetë e mundshme sipas orarit të caktuar të punës: nga ora 05:00 deri në orën 22:00.

Shkollat:

Mësimi do të fillojë me orar të plotë. Nga data 17 maj, fëmijët do të kanë mundësi të vijojnë mësimin në klasat e tyre dhe me orar të rregullt, pesë ditë në javë.

Testet e rregullta antigen janë si parakusht për të vijuar mësimin. Nxënësit do të testohen çdo 48 orë.

Dyqanet tregtare:

Rregulli “3-G” nuk është i domosdoshëm.

Nuk do të kërkohet asnjë dëshmi. Por parakusht mbetet rregulli 20 m2 për secilin klientë.

Maska dhe mbajtja e distancës minimum prej 2 metrave janë të detyrueshme.

Megjithatë dëshmia e “3 G-së” mbetet në fuqi nëse shkoni të floktari apo secili sallon ondulimi. Po ashtu për secilin klientë, nevojitet sipërfaqe 10m2.

Sporti:

Zbatohet rregulli i  “3 G-së”.

Të gjitha sportet janë të lejuar, edhe ato që kanë kontakt me persona tjerë.

Nuk kërkohet maskë apo distancë gjatë lojës.

Sportet në fushat e hapësirave publike mund të praktikohen deri në dhjetë persona.

Ngjarjet kulturore:

Për vizita në muze, teatër e tjera nuk kërkohet dëshmia e “3 G-së”. Ndryshe kërkohet  maskë dhe regjistrim për të gjitha ngjarjet kulturore

Për ndonjë event deri në 10-të persona nuk është e nevojshme leja.

Rregulli i “3 G-së” zbatohet për më shumë se 10-të persona. Për eventet mbi 51 persona duhet marrë lejen nga autoritetet përkatëse. Po ashtu obligohen të pranishmit që të mbajnë maskë dhe midis personave duhet të jetë një ulëse e zbrazët.

Dasmat mund të organizohen deri në 50 persona.

Në ambientet e jashtme lejohen të mbahen aktivitete deri në 3 mijë persona, ndërsa në ambiente të brendshme deri në 1.500 persona.

Aktivitetet gjatë kohës së lirë:

Regjistrimi për hyrje në pishina nuk do të kërkohet. Por rregulli i “3 G-së” është i obligueshëm.

Ndërkohë për vizitat në pishina me ambient të brendshëm përveç “3 G-së” është i detyrueshëm edhe regjistrimi.

Puna në zyre:

Kërkesa për mbajtjen e maskës në vendin e punës është e obligueshme, kur brenda një zyre punojnë disa persona.

Në rast se në atë dhomë pune, punon vetëm një person, nuk obligohet mbajtja e maskës.

Persona që kanë kontakt me klientë, duhet të testohen të paktën një herë në javë. (Përjashtim bëjnë: personat e vaksinuar apo të shëruar nga Covid -19).

 

 

---