Parku i të martuarve në Prishtinë

Rregullimi bazik i parkut pritet të përfundojë shumë shpejt, dhe më tutje ai do të pasurohet në vazhdimësi nga çiftet që do të martohen në kryeqytet

Komuna e Prishtinës në bashkëpunim me Coca-Cola HBC Kosova, ka filluar rregullimin e parkut të të martuarve, park ky i pari i këtij lloji në Kosovë, raporton albinfo.ch.

Sipas njoftimit të Komunës, tashmë po punohet për rregullimin e shtigjeve, ulëseve dhe hapësirave të tjera të këtij parku, në kuadër të projektit paraprak të Komunës.

Rregullimi bazik i parkut pritet të përfundojë shumë shpejt, dhe më tutje ai do të pasurohet në vazhdimësi nga çiftet që do të martohen në kryeqytet.

Secili nga këto çifte, do të ketë mundësi të mbjellë një fidan në këtë park. Në këtë formë, përveç që do ta shënjojnë lidhjen e tyre, do të ndikojnë direkt në zgjerimin dhe kultivimin e hapësirave të gjelbra.

Ky është veç një hap i vogël, por tejet i rëndësishëm në përmirësimin e ambientit në kryeqytetin e Kosovës.