Parada shqiptare në New York, sivjet kishte temë Çamërinë

Komuniteti shqiptar i New York-ut ka mbushur qytetin me ngjyrat kuq e zi,  ku u krijua një det flamujsh të kuq në qendër të Manhatanit, me shqiptarët që këndonin dhe kërcenin këngë popullore nga krahina të ndryshme, përcjell albinfo.ch.

Mes mijëra njerëzve që morën pjesë, kishte shqiptarë edhe nga shtete të tjera.
E veçanta këtë vit ishte se parada i kushtohej Çamërisë.

Organizatorët thanë se duan që qeveria greke të njohë masakrat ndaj popullsisë çame dhe dëbimin e tyre nga trojet 75 vjet më parë, në vitin 1944.

“Ne kërkojmë nga Greqia thjesht një falje, nuk duam hakmarrje. Gjithashtu duam që t’i lejojnë viktimat, t’i lejojnë të mbijetuarit të kthehen në shtëpitë e tyre, aty ku janë me shekuj”, ka thënë Marko Kepi, një nga organizatorët e paradës.

Njerëzit kishin ardhur të nderonin shqiptarët e Çamërisë, secili në mënyrën e tij dhe simbolet shqiptare dominonin kudo.

Kreu ceremonial i paradës ishte gazetari nga Shqipëria, Marin Mema.

Në paradë kishte ardhur si çdo vit me Kadillakun e tij antik ish-kongresmeni me origjinë arbëreshe, Joe Dioguardi.

“Jam shumë krenar që jam shqiptar arbëresh amerikan. Jam shumë i lumtur që jam me ju sot”, thotë ai.

Sipas të dhënave të policisë, në paradë morën pjesë të paktën gjashtë mijë vetë, shkruan zëriamerikës.

Ndër paradat e komuniteteve të ndryshme që organizohen në Manhatan në muajin qershor, ajo e shqiptarëve dallohet nga pjesëmarrja e madhe dhe nga dinamizmi që krijojnë këngët e vallet popullore.

https://www.youtube.com/watch?time_continue=10&v=JttU-Hktkw0