Nga korriku nis zbatimi i marrëveshjes Shqipëri – Itali për pensionet

(KEYSTONE/Martin Ruetschi)

Nga muaji korrik, emigrantët shqiptarë në Itali do të përfitojnë nga marrëveshja e pensioneve, sipas së cilës, Italia do të njohë dhe do të llogaritë kontributet shoqërore që këta emigrantë derdhin nga puna e tyre për efekt pensioni.

Marrëveshja është nënshkruar në muajin shkurt, teksa pas miratimit ajo nuk kufizohet vetëm për pensionet e pleqërisë por shtrihet edhe te përfitimet e invaliditetit, pensionet familjare, sigurimin nga sëmundjet, barrëlindja dhe papunësia, shkruan Euronews, transmeton albinfo.ch.

Për procedurë, emigrantët shqiptarë që janë në prag pensioni mund të aplikojnë pranë Institutit të Sigurimeve Shoqërore në Itali. Rreth 500 mijë shqiptarë që jetojnë dhe punojnë në Itali, por edhe shtetas italianë që janë të vendosur prej vitesh në Shqipëri, pritet të përfitojnë nga njohja reciproke e pensioneve.

Një person që ka 10 vjet punë në Shqipëri dhe 15 vjet punë në Itali, mund të përfitojë një pension në Shqipëri dhe një pension në Itali për ato 15 vjet që ka kontribuar atje.

Ndryshe, Qeveria e Italisë ka parashikuar një fond prej 136 milionë eurosh për zbatimin e njohjes së pensioneve deri në vitin 2032.