Në Berlin u prezantua romani “ë” i autores Jehona Kicaj

Në Ambasadën e Republikës së Kosovës në Berlin u prezantua romani “ë” i autores Jehona Kicaj

Në ambientet e Ambasadës së Republikës së Kosovës në Berlin, u mbajt prezantimi i romanit “ë” të autores Jehona Kicaj, një vepër e cila është përzgjedhur në listën e ngushtë për çmimin gjerman të librit 2025, një nga vlerësimet më prestigjioze në letërsinë gjermane dhe evropiane, përcjell albinfo.ch.

Në fjalën e tij hyrëse, Ambasadori i Republikës së Kosovës në Gjermani, z. Faruk Ajeti, vlerësoi lartë krijimtarinë e autores Kicaj, e cila me romanin e saj të parë ka shkruar histori, duke hyrë në përzgjedhjen e ngushtë për këtë çmim të rëndësishëm – suksesi më i madh i një autoreje me origjinë nga Kosova në hapësirën letrare gjermanishtfolëse.

Gjatë diskutimit, Jehona foli për librin e saj dhe shprehu mirënjohjen për përkrahjen e dhënë nga institucionet e Republikës së Kosovës, si dhe për organizimin e këtij promovimi në Ambasadën e Kosovës në Berlin. Romani “ë” është tashmë një bestseller për të cilin kanë shkruar mediat kryesore gjermane, duke vlerësuar lart stilin, tematikën dhe mënyrën e veçantë të të shkruarit të autores.

Përmes veprës së saj, Jehona Kicaj i ka dhënë zë viktimave të luftës së Kosovës, duke e bërë kujtesën pjesë të pandarë të narrativës së saj letrare. Ajo i jep zë dhe fuqi atyre që kanë vuajtur, duke luftuar kundër harresës dhe heshtjes përballë krimeve serbe ndaj popullatës civile shqiptare.

Në këtë ngjarje morën pjesë përfaqësues të trupit diplomatik, të institucioneve kulturore gjermane, të një numri të madh të mërgatës shqiptare, si dhe dashamirësve të letërsisë dhe artit gjerman.

---