Mundësi shkollimi për të huajt në Itali

15 mijë viza për studime për shtetas të huaj që duan të vijnë në Itali për të marrë një zanat.

Të huajve u hapen dyert falë një dekreti të Ministrisë së Punës, të miratuar bashkë me Ministrinë e Brendshme dhe të Jashtme, që autorizon hyrje të reja për ndjekje kursesh formimi profesional apo për të përmbyllur në Itali një praktikë pune, një formim të nisur në vendin e origjinës.

Siç raporton portali „shqiptariitalise“, për të parën herë vendimi është trevjeçar, pra kuotat e tij mund të përdoren nga viti 2014 deri më 2016-ën.

Në një kohë kur flukset për punë janë praktikisht të bllokuara për shkak të krizës ekonomike, pikërisht formimi profesional mbetet një ndër të paktat kanale akoma të hapura për të hyrë në Itali.

Vendimi i nënshkruar më 25 qershor dhe i botuar në Gazetën Zyrtare më 1 nëntor, i ndan kuotat e hyrjeve si më poshtë:

7.500 hyrje do të jenë për ata që marrin pjesë në kurse formimi, të organizuara nga ente të akredituara, që mund të zgjasin 2 vjet, e që duhet të parashikojnë lëshimin e një kualifikimi apo të një dëshmie mbi kompetencat e fituara.

7.500 hyrjet e tjera do të jenë për ata që duan të bëjnë praktika pune, që duhet të zhvillohen sipas një projekti të miratuar nga autoritetet kompetente.

Të huajt që duan të përfitojnë nga ky vendim duhet të paraqiten në Ambasadën Italiane në vendin e tyre dhe bashkë me kërkesën e vizës, të dorëzojnë edhe dokumentacionin lidhur me kursin apo praktikën e punës që do të ndjekin në Itali.

Kush vjen në Itali përmes këtij kanali ka të drejtën e një lejeje qëndrimi për studime.