Motoristët “ia shkelin” edhe njëherë, kësaj radhe për humanizëm

Klubi i motoristëve nga Zvicra “Plisat” me të hyrat nga biletat e kësaj mbrëmje po edhe nga iniciativat tjera humanitare planifikon të bëjë një familje skamnore në Kosovë me shtëpi të re

Rümlangu i Cyrihut gumëzhinte të premten nga zhurma e motorëve të cilët lartë përcillnin tymin dhe mesazhin e një feste të botës motoristike shqiptare në Zvicër, që  organizonte klubi i motoristëve “Plisat”.

Klubet motoristike shqiptare nga e tërë Zvicra dhe adhuruesit e këtij sporti ekstravagant erdhën në mënyrë të organizuar në “Rinora 4” ndërsa festës i prinin motoristët e klubit të motoristëve “Plisat”.

Para se të fillonte festa, motoristët përshëndetën njëri-tjetrin  duke prezantuar motorët e tyre në këtë shou motoristik dhe vallëzuan deri në orët e hershme të mëngjesit në diskotekën “Rinora 4”.

Të pranishmit i ka argëtuar bendi i njohur kosovar  “NRG Band” ndërsa organizatorët kanë ndarë mirënjohje për klubet e pranishme në këtë “Gala Night”.

Të gjithë së bashku lansuan edhe zyrtarisht sezonin motoristik 2017.

Motoristët shqiptarë i ka nderuar me praninë e tij edhe boksieri i njohur kosovar që jeton në Zvicër, Arnold Gjergjaj.

Klubi i motoristëve nga Zvicra “Plisat” me të hyrat nga biletat e kësaj mbrëmje po edhe nga iniciativat tjera humanitare planifikon të bëjë një familje skamnore  me shtëpi të re.

“Plisat” kanë ndërtuar dy shtëpi vjet dhe parvjet në Kosovë, sivjet të tretën do ta ndërtojnë në Luginen e Preshevës dhe premtojnë që vitin e ardhshëm do të ndërtojnë edhe një në Maqedoni dhe pastaj në Shqipëri.

.