Ministri i brendshëm: Bëhet fjalë për sulm terrorist i cili po vazhdon

Ministri i Brendshëm i Austrisë Karl Nehammer posa tha në ORF se me sa duket ishte një sulm terrorist. "Sulmi është ende në vazhdim"

Në sulmin që u bë sonte në Vjenë, pati disa të plagosur rëndë dhe mediat shkruajnë po ashtu edhe për disa të vdekur.

Ministri i Brendshëm i Austrisë Karl Nehammer ka thënë për ORF se “me sa duket ishte një sulm terrorist.2 “Sulmi është ende në vazhdim”, ka shtuar Nehammer, transmeton albinfo.ch.

Ai ka theksuar se në lidhje me sulmin, kishte disa të plagosur dhe “ndoshta edhe të vdekur”.

“Është e vështirë të thuash diçka më saktësisht në këtë moment”. Agjencia austriake e lajmeve APA ka raportuar, duke cituar Ministrinë e Brendshme, se është bërë një arrestim.

Njëri nga autorët e krimit thuhet se ka vdekur, një tjetër mund të ketë qenë në arrati. Sipas një zëdhënësi të ministrisë, një polic është qëlluar dhe është plagosur rëndë në shkëmbimin e zjarrit pranë sheshit Schwedenplatz.

Për këtë polic, ka media që thonë se ndërkohë ka vdekur nga plagët e marra por nuk ka ende ndonjë konfirmim zyrtar rreth kësaj.

Po ashtu disa media shkruajnë për 7 persona të  vdekur por për këtë mungon konfirmimi i autoriteteve zyrtare.

Ende nuk është konfirmuar nëse sinagoga aty pranë ishte shënjestra e sulmit, ka thënë zëdhënësja, përcjell albinfo.ch. Sfondi i ngjarjes fillimisht ishte i paqartë.

Një reporter i ORF ka raportuar se pjesë të mëdha të qendrës së qytetit ishin rrethuar dhe policia po kërkonte edhe autorin tjetër të përfshirë në sulm.

Sipas informacioneve të para, ende të pakonfirmuara, flitet për disa pengmarrje në disa restorante në lagjen 6 dhe 7 të Vjenës, transmeton albinfo.ch. Policia vjeneze ka mobilizuar një numër të madh policësh.

---