Mercedesi tërheq nga tregu mbi një milion vetura në SHBA

Mercedes-Benz është duke i tërhequr nga tregu më tepër se një milion vetura për shkak të një defekti në siguri, me sistemin e thirrjes së emergjencës në vetura, raporton BBC.

Problemi është te sistemi “eCall” në vetura, që alarmon shërbimet e emergjencës për një aksident dhe mbështetet te lokacioni i veturës për të lajmëruar ato për vendndodhjen.

Mirëpo, një gabim në sistem nënkupton se është e mundur të dërgohet lokacioni i gabuar.

Problemi ka prekur 1.292.258 vetura në SHBA, dhe kompania thotë se po përgatitet të regullojë këtë për konsumatorët edhe në shtetet e tjera.

Sipas informatave të Administratës Amerikane për Siguri Trafiku, thuhet se nuk mund të përjashtohet mundësia e rrezikut të sigurisë.

Pasi që problemi është i lidhur me softuerin, rregullimi i problemit mund të bëhet duke përdorur një shkarkim “wireless” duke përdorur të dhënat e veturës.

Por, nëse nuk mund të bëhet, për shkak të lidhjes së keqe apo problemeve të tjera, atëherë pronarët do të jenë në gjendje të sjellin veturat e tyre te një mekanik i autorizuar për të përditësuar të dhënat.

Sistemi eCall është i obligueshëm në BE për gjitha veturat që nga viti 2018, dhe dokumentet në SHBA zbulojnë se arsyeja prapa hetimit ishte një rast i njohur për dërgim të lokacionit të gabuar.

“Ky përditësim i softuerit po ashtu do të implementohet në shtetet e tjera dhe jemi në kontakt të ngushtë me autoritetet lokale”, është thënë nga Mercedes-Benz në Britani.