Mehmeti: Loja e UNMIK-ut me të zhdukurit

"Kur kjo çështje ishte kompetencë dhe përgjegjësi e tyre, ky mision nuk është interesuar fare për fatin e mijëra të pagjeturve"

Kryetari i Shoqatës për të Zhdukur “Përkorë” në Podujevë, Latif Mehmeti ka akuzuar misionin e OKB-së në Kosovë UNMIK-un duke thënë se nuk ka më asnjë kompetencë ekzekutive për çështjen e të zhdukurve.

Ai thotë se kur kjo çështje ishte kompetencë dhe përgjegjësi e tyre, ky mision nuk është interesuar fare për fatin e mijëra të pagjeturve. Sipas tij, që nga përfundimi i luftës, në vitin 1999,  deri në vitin 2007 Kosova është administruar tërësisht UNMIK-u.

“Me vetë faktin se ishte autoriteti kryesor administrativ, UNMIK-u kishte përgjegjësi edhe për çështjen e personave të zhdukur gjatë periudhës 1998-1999. Këtë kompetencë UNMIK-u e kishte deri pas  shpalljes së  Pavarësisë së Republikës  së Kosovës, kur në Kosovë vjen Misioni për Sundimin e Ligjit – EULEX, i cili mori shumë kompetenca për administrimin e Kosovës në aspektin e sigurisë dhe sundimit të ligjit, ndër to edhe çështjen e të Zhdukurve, kompetencë që e mban edhe sot.

Mirëpo, me shpalljen e pavarësisë dhe me ardhjen e EULEX-it nuk u shua misioni i UNMIK-ut, i cili pa asnjë kompetencë vazhdon të qëndrojë në  Republikën e  Kosovës. Dhe shih ironinë, tash kur ky mision nuk ka asnjë kompetencë ekzekutive, ka filluar të interesohet për çështjen e të zhdukurve. Ndërsa, kur kjo çështje ishte kompetencë dhe përgjegjësi ekzekutive e tij,  nuk është interesuar fare për fatin e mijëra të pagjeturve.

Prandaj nuk duhet të jesh shumë i mençur për ta kuptuar lojën e UNMIK-ut, sidomos kur të kihet parasysh se në mbledhjen e fundit të Këshillit të Sigurimit të Kombeve të Bashkuara, ambasadorja e Kosovës në SHBA, zonja Vkora Çitaku kërkoi largimin e UNMIK-ut nga Kosova”, ka shkruar Mehmeti.